|
Iggut umedlu ula izillîd,
iguten
waggagen ula usman
Iga d umedlu tillas ig d unzâr imettâwen
Aggagen d usman, rrsâs, ijiwi iga takat
Yut axyyam bbin t, yut man gis ufan
Mmuten midden s lghdêrt,
igigilen
ar ukan allan
Amettâ irmi t umagus,
ilîh ma ten itterhâmen
Agharas immenàa issa s usennan
Anmuddu irufa gh tmazirt gh llan waman
Iz d is iggul wakal ur ran a sul semghayn
Nigh d iz d amud a sul ur iran ad nekren
A tent ihêsn yan urta luzzant igh iferk
Igh luzzant munent labud man iffal
A tent ihêsn ljid gh lhul isber nit
Âh mla ur igi sber ur sar ijud
Igh d iterm umalu tiffawin is-d ruhênt ?
Ar ad a njud s wawal f uzemz ad nfasert
Maf tga ssâbt amazûz ig usmam amadagh
Igli wasif adrar idâlb lbhêr laman
Iga d lhul ccbayk neg nkwnin iselman
Ig leghdêr anemyur ig laman abukâd
Ig uccen ameksa ig asen umksa amessagh
Icca uccen ameksa tg as tili taghuyyit
Argaz iga t lmal bulàaql iga anewwac
Ig wajbir lkenz ig ttêmâ agharas |
|
Wa manik s ira dax izri wattân nnun
A tallamt idamen a tîtt ka yyin ighaman
Imma amettâ nsermi t ur nesndem yan
Seàd inu igigil a tgit, mani rix
Uzzelgh nega afellâh ur sul llan waman
Uzzelgh nega akessab txerfemt a taganin
Akwem saqsagh a tuga gh waman is llan
Iggi n terga ayad urta iqqur làin
Izug uglif ifel sselt lli gha ttilin
Ur ten tumit a taddart ihûssa takat
Ajeddig irêza watig nnes meqqar akw ixelf
Zugent tizzwa lli bedda gisen ittarun
Aman ur lin làib igh gisen illa irîz
willi gisen ittagmen nettnin aten irwin
Ur ak nesfa nknin iz d ad sfun waman
Ay ajeddig
Ddunit walabud a tesaka yan afus
F lxatêr ad ur tallat agwelif ur jlan
Nufa d yad mdden da smittîwen i wiyyâd
Asemammi ula amettâ ur a sers tilit atig
Meqqar k ihêkam ufus lligh ur tettâft asennan
Fek tujjut ar tesbughlut, akal fek as amud
Ad ur tinnit uhuy arraw ira d nkern
Ar igh lkmen. làin irifi ira yafûd
Uggug ira ad negnin rad kullu tsum atig
Agwelif rad urrin ira sul isker ameccâd |
|
Nega butfala nenûda âh nili gh ugharas
Kulu may lan awurz ar fella ti ttakwlen
A àemdan igdâd igh nduy mani ten yuman
Ur immut ulgwemâd is ka ikcem tillas
Tafukt lli gha igemmer ays sul ur illan
Ssem iffegh algwemâd ikcem k ay anewwac
Nega takniwin nhul tenni t iyyi nnigh ak
Ajj at angh akwen najj a tnaqest a takat
Tillas ad nekka, tiyyâd ad nufa mdint agh
Mamenk s ira ay sfiw a immi warraw nnem
Nufa d lhêya immut, nufa d laman izug
Mamenk s ira a tenjemt i tawdiwin a wul
Làaql iga d lmizan ira ays nsers
Lhâq d lbâdl iggi nnes aten isemkilil
Làaql da swingimen sawlen inin agh
Lhâq imdêl t uqarîd ig fellas isemgan
Wanna yad igan izem gin fellasen tidâf
Ar asen sghalen izmuzzâl tissiy asen latêrt
As nna ten ghwin luhên gisen tawda s ukuray
Gen tin gh izîtti n uzzal sdusen fellas akerraf
Mac izem walli t yegan ur issen tasergemt
Xettad ijran a midden wak wak angh
Yiwi d usemammi n midden taghlaghalt
Trêza yagh tudert ittyagas làaql
Yawi yagh ungi n uswingem ilîh agh tilili
Iffu lhâl i wi da agh ranin tifawt
Nsugga isental, nsugga igharasen
Ur nessin man azemz arad agh kmlent
Ibayn agh d Rebbi lmendaf urta yumêz
Afus gh ufus ad nefsi ikerrafen |
|
Wa yam a tili thûbbamt uccen ira kem
Ifa yam laman n Rebbi tament is
Wa tillas kas iqqel ad ilint icc kem
Udaden ran lbhêr ddunit kmmelnt
Iselman ran ax ajarif yatuyen |
